Na República Bolivariana de Venezuela, a Semana Internacional de Solidariedade com Euskal Herria -semana em que se organizárom volanteos, cineforos e programas de conscientizaçom em rádio e televisom- foi encerrada com um acto político-cultural na praça Bolívar de Caracas, onde se realizou umha oferenda floral ao Libertador Simón Bolívar sob o lema "Polo socialismo, liberdade para Euskal Herria!". O evento realizou-se na sexta-feira 12 de Fevereiro por volta do meio-dia neste lugar emblemático no núcleo histórico da cidade, onde há poucos dias o edifício La Francia passou a maos do povo, reivindicando a sua condiçom de património nacional.
No evento, realizou-se umha panóplia de actividades diversas: repartiu-se um delicioso marmitako entre os centenas de caraquenhas e caraquenhos lá congregados, enquanto desde a Esquina Caliente (Esquina Quente), centro de actividade política revolucionária na praça, se faziam intervençons em solidariedade com o Povo Basco e a sua luita. Durante a jornada, que coincidiu com o Dia da Batalha da Vitória ou Dia da Juventude Revolucionária, foi repartido o comunicado do Colectivo de Solidariedade Pakito Arriaran -comunicado que reivindica o direito à autodeterminaçom de Euskal Herria- e entregou-se o primeiro número do boletim do Colectivo que inclui artigos sobre o regime de opressom a que está submetido o Povo Basco polos Estados imperialistas espanhol e francês, e sobre a dispersom e a tortura dos presos políticos entre outros.
Na quinta-feira 11, na Universidade Bolivariana da Venezuela, realizou-se um videoforum no qual foi visionado Euskal Herria: umha história de luita e resistência, um documentário de Resumen Latinoamericano e Askapena. Depois da projecçom, os assistentes participárom numha activa e interessante discussom sobre o filme, na qual se tratou a diferença entre Estado, povo e naçom, e se aprofundou sobre a história de repressom e resistência em Euskal Herria, vinculando a luita anti-imperialista que irmana os povos venezuelano e basco com a luita pola construçom do socialismo.
Estas jornadas, impulsionadas polo Colectivo de Solidariedade Pakito Arriaran, contárom com a participaçom e apoio do Movimento Continental Bolivariano e da Coordenadora Simón Bolívar, entre outras organizaçons.