A vaga repressiva que o Estado espanhol desenvolve na Galiza nas últimas horas através dos seus corpos policiais e meios de propaganda saldou-se até o momento com a detençom dos independentistas galegos Diego S. M., Carlos C. V., Xurxo R. O., Héctor J. N. G. e Miguel P. G. Os quatro primeiros militantes encontram-se incomunicados e transferidos a Madrid, enquanto o último foi posto hoje em liberdade.

 Causa Galiza quere pontualizar ante este novo golpe repressivo contra a militáncia independentista as seguintes questons:

 1º Lamentamos mais umha vez o deplorável papel jogado pola prática totalidade dos meios de comunicaçom, que novamente suprimem a presunçom de inocência dos detidos e somam-se às directrizes mediáticas fixadas polos seus captores violando todos os códigos deontológicos conhecidos.

2º Manifestamos a nossa profunda preocupaçom pola situaçom em que se podam encontrar nestes momentos os detidos Diego S. M., Carlos C. V., Xurxo R. O. e Héctor J. N. G., umha vez que é conhecida a “normalidade” com a que, sob o regime de detençom incomunicada de militantes independentistas, se produzem no Estado espanhol todo tipo de abusos, vulneraçons de direitos e incluso torturas. O amplo curriculum que neste sentido atesoura o regime monárquico, denunciado por organismos anti-repressivos e instáncias internacionais, assim o testemunha.

3º Reconhecemos nos quatro cidadáns galegos que neste momento se encontram em paradeiro desconhecido e com todos os seus direitos constitucionais suspendidos a pessoas comprometidas com a luita pola liberaçom nacional e social do nosso País e gentes cuja integraçom social e compromisso patriótico som sobradamente conhecidos e reconhecidos. A linchagem mediática que trata de apresentá-los como “perigosos terroristas” e “radicais” fai parte, nojentamente, do operativo policial despregado nas últimas horas e pretende a sua satanizaçom.

4º Exigimos a suspensom do terrorífico regime de detençom incomunicada sob o que estám nestas horas Diego S. M., Carlos C. V., Xurxo R. O. e Héctor J. N. G. e a sua imediata liberdade e retorno à Terra e manifestamos a nossa preocupaçom porque, seguindo umha pauta de comportamento comum neste tipo de casos, o Estado espanhol decida após o “juízo” mediático e televisado encarcerá-los “preventivamente”, é dizer, sem juízo nem garantias, e com a engádega provável da sua dispersom a centos de quilómetros do nosso país.

5º Queremos declarar, alto e claro, que nem esta nem outro tipo de medidas repressivas vam afogar a nossa vontade de compromisso e luita para que a Galiza continue avançando no caminho da autodeterminaçom e a independência nacional. Golpes repressivos como o actual evidenciam a debilidade do Estado espanhol, aqueixado por umha profunda crise económica e social, política e de legitimidade e incapaz de solventá-la sem abordar as raizes dos conflitos que o corroem.

6º Chamamos ao Povo Galego a e à militáncia nacionalista e independentista a nom deixar-se amedrentar polos inquisidores de onte e de hoje, a nom ceder ao domínio polo medo, a continuar cada quem na sua trincheira quotidiana, com mais força e firmeza, se calhar, e a acodir aos actos e mobilizaçons de solidariedade que se anunciem nos próximas dias e horas.

7º Por último, enviamos um forte abraço às famílias, aos amig@s e companheir@s dos quatro detidos. Nestes momentos, o nosso pensamento e a nossa solidariedade encontram-se com todas e todos eles.

LIBERDADE PARA OS INDEPENDENTISTAS DETIDOS!

RESPOSTEMOS À REPRESSOM!

DEFENDER A TERRA NOM É DELITO!

ADIANTE A LUITA POLA INDEPENDÊNCIA!