Un cento de persoas concentrouse esta mañá na Praza das Praterías de Compostela para celebrar o 40 aniversario da creación da República Árabe Saharauí Democrática (RASD). Na mobilización, na que participaron membros destacados do BNG, de AGE e de Compromiso por Galicia, amais da CIG e de CCOO, berráronse lemas como “Sáhara liberdade, Polisario vencerá” e “Viva o Sáhara Libre” e leuse un manifesto no que se reivindicou a fin da ocupación.

Aliás, en máis de 60 concellos galegos ondea este sábado a bandeira do Sáhara en apoio ás reivindicacións do pobo saharauí. Galiza é o territorio do Estado en que máis bandeiras ondean.