A resposta à convocatória de políticos como Francisco Vasques, opinadores profissionais como Blanco Valdés ou antigalegas militantes como Gloria Lago tivo pouco eco, mas contou com total cobertura mediática.
Apelos aos "tanques", insultos de "sediciosos" e decorados rojigualdas fôrom o pano de fundo para que o espanholismo tentasse umha afirmaçom coletiva frustrada. Ao todo, umhas poucas dúzias de pessoas concentrárom-se na soma das três cidades (Vigo, Corunha e Compostela).
No caso da capital galega, líderes e ex-dirigentes dos dous principais partidos do regime, PP e PSOE, concorrêrom abraçados na praça do Obradoiro em defesa da "unidade de Espanha". Estavam Sánchez Bugalho (ex-presidente da cámara polo PSOE), Agustín Hernández (PP) e o opinador a soldo Blanco Valdés. Poucos mais, se descontarmos os polícias que evitárom que vizinhos e vizinhas se aproximassem ao lugar para increpar o grupo de espanholistas profissionais.
A polícia retivo alguns independentistas, militantes de Causa Galiza, que tentavam despregar a palavra independência com letras de grande tamanho. Também militantes de NÓS-UP, Briga e Agir, assim como outras pessoas ativas nos movimentos sociais compostelanos, tentárom manifestar repúdio perante a manifestaçom dos ultras.
Na Corunha, a mini-concentraçom pró-espanhola foi liderada por Francisco Vasques, ex-presidente da cámara polo PSOE e ex-embaixador do Reino de Espanha no Vaticano. Megafone em mao, encorajou várias dúzias de pessoas, visualmente identificáveis como burguesia espanholista corunhesa, incluídos militantes de pequenos grupos de extrema-direita como Vox.
Em Vigo, a "protagonista" da exibiçom anti-catalá foi Gloria Lago, dirigente do grupo ultra "Galicia Bilingüe", entidade partidária da supremacia lingüística espanhola e da expulsom do galego das instáncias públicas oficiais galegas.
Apesar da reduzida participaçom nas diferentes convocatórias, televisons, rádios e jornais burgueses pró-espanhóis marcárom presença e dérom cobertura às concentraçons.
Foto 1: O ex-presidentte da Cámara da COrunha Francisco Vasques defendendo Espanha megafone em mao hoje na praça Maria Pita.
Foto 2: Identificaçom de vizinhas e vizinhos de Compostela opostos à exibiçom ultra na praça do Obradoiro, em Compostela.
