Foto de Marea Atlántica (CC BY 3.0) - Xulio Ferreiro é o Presidente da Cámara Municipal da Corunha.
A monárquica e espanholíssma taça custará, segundo o Grupo Municipal do BNG denuncia através da vereadora Avia Vieira, mais de dous milhons de euros do orçamento municipal. Serám 605.000,00 € polo 'canon' exigido polo convénio de colaboraçom, 199.460,51 para acondicionamento do Coliseum, 176.562,24 € previstos nos orçamentos municipais para "Torneios desportivos. Sede da final da Taça do Rei de Baloncesto", 940.904,09 € para reabilitaçons de diferentes zonas do Coliseum - 84.163,96 € para a zona de autoridades. Assim até ultrapassar os 1,900,000 €. No dia 26 de janeiro esse mesmo partido calculara o esbanjamento em um milhom de euros, mas a publicaçom da totalidade da documentaçom referente ao evento no dia seguinte duplica a estimativa inicial.
É um dinheiro de que o desporto popular se verá privado graças à iniciativa da Cámara Municipal de Xulio Ferreiro. O orçamento total destinado ao desporto polo governo cidadanista é de 9,000,000 de euros, dos quais 50% som destinados a serviços complementares, obras de reabilitaçom e despesas de energia.
José Manuel Sande, vereador de Culturas, Desporto e Conhecimentos na Corunha, já expressara em outubro de 2015 o seu compromisso com a Copa del Rey, que mantém meses depois. Mais umha iniciativa polémica, portanto, do governo cidadanista e alegadamente progressista da Maré Atlántica, que após dar suporte a um contestado Congresso da Confederación Española de Directivos y Ejecutivos e com a sua polícia a agir contra o ativismo corunhês, traz agora à Corunha um caríssimo evento desportivo-mercantil portador dos valores mais cañís da monarquia hispánica.
