Por mais sinal, o governo autárquico pretende impedir a celebraçom da Foliada Aberta ao Mar, prevista para 26 de Abril. A plataforma recebeu recentemente a resposta negativa à sua petiçom de usar a Praça de Esther Pita para a celebraçom da foliada, sob o argumento surpreendente de que "se trata de umha praça muito concorrida, sobre tudo por crianças e especialmente em fins de semana e feriados", como se a música tradicional e os jogos populares fossem incompatíveis com a infáncia. A Praça Esther Pita encontra-se a poucos metros do solar afetado polo projeto urbanístico da discórdia e com efeito é um lugar concorrido por estar justo ao pé do Parque Luís Seoane e o passeio marítimo. No próprio argumento, o governo local desvela o motivo real da prohibiçom: o seu temor a que a vizinhança se achegue à foliada e pergunte sobre as alternativas que Santa Cruz Aberta ao Mar defende para um terreno cujo destino ideal, pola sua ubicaçom, seria passar a ser de domínio público. Sem dúvida o Presidente da Cámara terá medo de que o contato da plataforma com a vizinhança desmonte as suas mentiras e manipulaçons e ponha em evidência o seu proceder interesseiro e tendencioso.
Por seu turno, umhas jornadas de debate também organizadas por Santa Cruz Aberta ao Mar, terám com quase total segurança que ser celebradas na paróquia de Santa Maria de Oleiros, ao também ser-lhe denegada à plataforma a utilizaçom do Teatro Municipal das Torres. De novo, o governo autárquico evidencia de umha maneira extremadamente torpe o seu pánico a um grupo de vizinhos e vizinhas que tiverom a ousadia de pôr em causa atuaçons urbanísticas no concelho que durante anos passou por modélico em matéria urbanística.
Em qualquer caso, de NÓS-UP condenamos as atitudes anti-democráticas de um projeto que sempre cheirou a personalismo e populismo barato e que sempre tivo calada a voz de boa parte da esquerda (sobre tudo a institucional) a travês da cooptaçom e sob a chantagem de ser Oleiros "única autarquia da esquerda" na comarca, repartida tradicionalmente entre PSOE e PP. Ángel Garcia Seoane e o seu caduco e corrompido projeto em nada representam à Esquerda Independentista, e menos com a deriva dos últimos anos, na que de maneira cada vez menos disimulada Alternativa dos Veciños navega cara um modelo de concelho baseado no turismo e nos núcleos de povoaçom de caráter residencial, destroíndo e despersonalizando a contorna.
Seguiremos apoiando as iniciativas de Santa Cruz Aberta ao Mar e esperamos que a pressom popular chegue a ser tal que finalmente nom haja mais remédio que dar-lhe a esta polémica umha soluçom política.