Desde a identidade comunista, feminista e independentista, "orgulhamo-nos de ter facilitado este espaço durante este tempo. Comprometemo-nos a mais anos, mais trabalho e mais rede de coesom com os movimentos populares e os demais locais sociais rebeldes da cidade", explicam.

Este mês introduzem no cartaz das suas atividades "muito circo". Porque por compromisso com a Liga Gallaecia, tinham que acolher de forma obrigatória umha jornada no primeiro fim-de-semana do mês, e terám umha no penúltimo. "E nada nos alegra mais que este circo tam sam, misto, popular, galego e nom profissional". Polo terceiro ano de Liga, de novo voltará a finalizar na Corunha. Mais umha vez a estampa da Torre será o fundo dum campeonato que pola primeira vez tem adquirido Condado FG.

Isso será no finde do dia 23. Para o próximo tenhem a visita do Davide Salvado, reconhecido cantor nacional, promessa em pé do canto nacional. Será na sexta 16 às 22h polo preço de 5€ com aforo restringido à capacidade do local.

Para rematar o mês, sexta-feira 29 às 20h30 haverá umha festa com apresentaçom do livro do preso político independentista Carlos Calvo Varela. Sim, lestes bem. "Já vos daremos mais detalhes mas nom será umha simples e aborrecida apresentaçom dum livro, nom. O coletivo de apoio ao Carlos vai-nos deleitar com toda umha celebraçom".