«Galiza polo paz. Non á guerra imperialista». Ese é o lema co que diferentes movementos sociais de Vigo e comarca chaman á cidadanía a concentrarse o vindeiro Sábado en Vigo.

«Os movementos sociais vigueses estamos pola Paz, un valor sempre ameazado polo odio e polos intereses imperialistas en todo o mundo. A primeira vítima das tensións bélicas mundiais son os dereitos e a democracia», apuntan os colectivos que apoian a concentración.

Entre estes están a Asemblea Popular de Vigo, RSP, CUT, Ninguéns, Asemblea Republicana, CGT, Sindicato Ferroviario, STEG, PAH Vigo-Baixomiño-Tui, Acouga, SLG, Queremos Pasar, SAGAP, Plataforma en defensa Ensenada de San Simón, Piratas, FOAMPAS, A. Pensionistas Retornados, Ponte Solidaria, AGABO, Plataforma Cidadá de Redondela, Sindicato da Elevación, Plataforma Hepatites C, Fronte Cívica e Foro Social de Cangas.

«A contrapartida á barbarie de París non pode ser a guerra, e si a desactivaciòn das ofensivas internacionais que deixan tras de si regueiros de medo, torturas e matanzas indiscriminadas de milleiros de persoas», suliñan nun comunicado.

Así, critican que hai anos que en Palestina, Afganistán, Iraque, Libia, Sudán, Iemen e Siria «as bombas e as armas da UE, da OTAN, de Israel ou dos EUA masacran a diario inocentes». «Se dalgo temos certeza é que nunca estará nas mans destes países e institucións a solución a ningún problema xeopolítico. Porque, en efecto, son parte do problema», conclúen.

A concentración terá lugar ás 18.00 horas do sábado, fronte ao Marco de Vigo. Ao final o escritor Álvarez Cáccamo lerá un manifesto.