Será nos das 20, 22 e 23 de julho, nas vésperas do Dia da Pátria Galega, e servirá para explicar na Galiza "o caminho do 27 de setembro", processo que deverá conduzir, nas eleiçons marcadas nessa data, a umha votaçom plebiscitária pola independência da Catalunha.
A representaçom catalá que vai protagonizar os atos públicos é formada por Maria Plana, porta-voz da iniciativa 'Som Països Cataláns', e Simón Vázquez, militante de Endavant (OSAN). "Os Països Cataláns hoje" é o título genérico das conferências previstas.
A tourné começa na capital da Galiza, Compostela, com umha palestra organizada pola Gentalha do Pichel. Será no dia 20 de julho, segunda-feira, às 20:30 horas, no Centro Social do Pichel, e depois da palestra haverá petiscos cataláns.
No dia 22 de julho, quarta-feira, Maria Plana e Simón Vázquez estarám na Corunha, onde falarám no Centro Social Gomes Gaioso, na rua Marconi, 9, bairro de Monte Alto. A conferência começá às 20:30 horas.
Já no dia 23, a delegaçom catalá visita o Centro Social da Fundaçom Artábria, em Ferrol. A palestra internacionalista começa nesta ocasiom às 19:30, dentro da 'Festa do 25J' que organiza a Artábria, e irá seguida, às 20:30, de umha grelhada popular de comemoraçom da Pátria Galega.
Para além do interesse geral do caminho que o povo catalám vem percorrendo em direçom à sua plena emancipaçom, esta tourné chega no momento em que estám a concretizar-se os termos da convocatória do 27 de setembro, com duas listas independentistas e umha contraofensiva política e mediática do Estado espanhol para tentar bloquear a qualquer preço o exercício do direito de autodeterminaçom da Catalunha. Teremos, portanto, ocasiom de esclarecer dúvidas e conhecer em primeira mao a estratégia popular pola independência que, com caráter de massas, se desenvolve no Principat de Catalunya.
