Logo dun amplo debate, e a inclusión de diversas propostas, decidiuse convocar unha gran mobilización nacional o sábado 24 de outubro ás 12 da mañá. Asemade, coa intención de ir quecendo motores, quedaron fixadas tamén varias manifestacións simultáneas nas cidades de Ferrol, A Coruña, Lugo, Compostela, Ourense, Pontevedra e Vigo que transcorrerán polas rúas reclamando pan, traballo e teito o xoves 8 de outubro.

Cómpre mencionar, tanto de cara ó programa de outubro como para as actuacións posteriores a nivel nacional e estatal, a data do 19 de setembro. Nesa altura celebrarase a II Asemblea Nacional Galega das Marchas da Dignidade na cidade da Coruña á que están convidadas tódalas agrupacións e movementos sociais das diferentes plataformas comarcais. Os colectivos e movementos sociais convocantes recalcan a importancia deste conclave para facer emerxer a loita na rúa tralo período estival e coa intención de levar a cabo un cambio social efectivo que non se constatará unicamente co cambio de cor política de certos concellos. Secundamos, por suposto, os novos escenarios abertos tralos comicios municipais e animamos a seguir diversificando e ampliando as mobilizacións. Esta é unha loita anti-sistémica.