Reproduzimos o seu primeiro comunicado na íntegra:

Comunicado Nacional de Imprensa Nº 1: Constituída Agora Galiza

Na tarde de sábado 4 de julho de 2015, na capital da Galiza, foi constituida Agora Galiza, organizaçom socialista e feminista galega de libertaçom nacional.

Um conjunto de homens e mulheres com dispares trajetórias militantes no ámbito político e social, perante a carência de um instrumento nacional de luita e intervençom de caráter plural, vocaçom de massas e sob o modelo organizativo de unidade popular, acordamos constituirmo-nos em ferramenta política independentista, socialista e feminista galega ao serviço da Galiza, do povo trabalhador e os setores empobrecidos e excluidos.

O processo constituinte que iniciamos culminará no primeiro trimestre de 2016 com a convocatória da I Assembleia Nacional onde aprovaremos o corpus político e ideológico tático e estratégico de Agora Galiza.

As duas primeiras decisons acordadas som:

1- Apoiar e aderir ao Dia da Pátria unitário entre todas as forças políticas e sociais galegas em prol da soberania nacional.

2- Contribuir à configuraçom de um amplo e plural bloco independentista no seio da manifestaçom patriótica de 25 de Julho, onde se visualice o pluralismo político, ideológico e social da esquerda independentista galega.

Nascemos com a firme vontade de contribuir modestamente à recomposiçom integral do campo da esquerda patriótica galega.

Objetivo urgente e imprescindível para articularmos em coordenadas galegas o movimento popular e enquadrar a mudança social que reclama a maioria do nosso povo no seio da rutura democrática com o regime espanhol que permita abrir um processo constituinte galego face umha nova Galiza com justiça social e soberana.

As nossas portas estám plenamente abertas a todas aquelas pessoas que queiram contribuir de forma generosa e altruista a comprometer-se desde cada umha das suas realidades sociais e locais, de forma organizada e com visom nacional.

Viva Galiza livre, socialista e feminista!

Denantes mort@s que escrav@s!

Na Pátria, 5 de julho de 2015

Direçom Nacional de Agora Galiza.