O Concelho de Trasmiras seria o local escolhido para a instalaçom de umha base de experimentaçom militar para avions espia promovida polo consórcio europeu da aviaçom EADS. O processo de decisom sobre a localizaçom definitiva está na fase final, segundo alguns meios, existindo possibilidades de que se instale ou na Galiza ou na Andaluzia.

A surpresa chegou com o posicionamento do Bloque Nacionalista Galego (BNG), que através do seu senador em Madrid, Xosé Manuel Peres Bouça, reclamou à ministra Carme Chacón que esclareça as possibilidades de Trasmiras, na comarca da Límia. Segundo Peres Bouça, "Trasmiras é o único que cumpre com todos os requisitos que precisa a empresa para levar a cabo este projeto", mas o executivo espanhol "parece estar a decantar-se pola localizaçom de Huelva". O BNG "lamenta" a "atitude passiva" do PP em relaçom à candidatura limiá, daí que o próprio Bloque defenda ativamente a presença de umha nova base militar do imperialismo em terras galegas.

Oposiçom ambientalista

Tanto a Sociedade Galega de Ornitologia (SGO), como a Sociedade Galega de História Natural (SGHN) manifestárom a sua oposiçom ao projeto, com base em argumentos conservacionistas, já que a base militar ocuparia um território que fai parte da Zona de Especial Protecçom para as Aves (ZEPA) da Límia. Inclusive ADEGA, entidade controlada pola UPG, fijo um posicionamento formal contra a base militar.

O projeto militar espanhol teria como objetivo a experimentaçom com avions sem piloto e nele participaria capital espanhol, francês e Alemanha, com um orçamento de 2.900 milhons e a promessa de criar 3.000 postos de trabalho.