"A reivindicación da liberdade resulta unha urxencia, un imperativo ético, nunha etapa na que o Capitalismo recorta os nosos dereitos e as nosas vidas, a clase traballadora debe volver a asumir o papel que historicamente lle correspondeu: defender a democracia. Pero non esta democracia, a "súa" democracia, unha democracia ao servizo dos grandes negocios e dos seus axentes, falamos de defender nas rúas a democracia popular, que no noso País aínda está por inventar".

Así defende a organización esta convocatoria propia, na que o sindicalismo alternativo e os movementos sociais da cidade serán os protagonistas. "Precisamos deixar claro o que é facer un sindicalismo ao servizo das traballadoras e traballadores, o que é loitar nas rúas e nos centros de traballo por un vida vivible, por unha vida digna. O que é demostrar a través do asemblearismo que a clase traballadora está preparada para asumir todo o conxunto de decisión necesarias para o seu día a día. Existe unha liña vermella e non a colocamos nós, colocárona os sindicatos que se desprenderon dos mínimos principios, así lles vai". Esta convocatoria rematará, tras o xantar popular, co concerto do grupo "Blues do País" e do compostelá "Sesión Vermouth".