Segundo explican este ano tiveron entrada no servizo empresas plenamente privadas, que se suman ao desmantelamento planificado nestes últimos anos do servizo propio da Xunta de Galicia. Denuncian que a día de hoxe son 5 os instrumentos que a administración galega emprega no operativo de extinción (persoal da Xunta, da empresa pública SEAGA, de TRAGSA, de NATUTECNIA e dos concellos a través dos GRUMIR), cada un coas súas condicións laborais propias, sen que sexa posible que exista unha coordinación axeitada, e que o que pretende realmente a Xunta é dispor de man de obra barata sen dereitos laborais, sen experiencia e non profesional. Unha política totalmente irresponsable nun asunto tan complicado en Galicia como o dos incendios forestais, que segundo din renuncia de antemán a realizar unha política preventiva e forestal verdadeira do monte galego.
As demandas fundamentais da Plataforma céntranse nos seguintes aspectos:
1. A defensa dun Servizo Público, Único e Profesional de Prevención e Defensa Contra Incendios Forestais. Non ás privatizacións do Servizo.
2. A contratación de todo o persoal realizada a través dun sistema único de listas de contratación, dentro do ámbito da función pública, e cunha valoración equitativa do tempo traballado segundo cada caso.
3. A profesionalización do dispositivo e eliminación do gasto da militarización dos nosos montes.
4. Por un Plano Forestal de verdadeira prevención de incendios. Un traballo digno no que se fomente a prevención e a colaboración cos propietarios forestais para a conciliación de intereses como ferramenta contra os incedios forestais.
5. A apertura inmediata dunha Mesa de Negociación onde se busquen solucións ao Servizo.
A Plataforma na Defensa do Servizo Público de Prevención e Defensa Contra Incendios Forestais, fai un chamamento público á sociedade galega a apoiar esta iniciativa de racionalizar a situación do monte galego, e en especial anima ás diferentes organizacións e colectivos vencellados ao sector forestal e ao mundo rural a sumarse a esta Plataforma, e a apoiar as súas mobilizacións.
Sinalan ademais que o sector forestal é unha riqueza de todo o pobo galego, e debemos ser todos e todas nós quen o defendamos das erradas políticas dos diferentes gobernos galegos.
Os traballadores contra incendios convocan unha manifestación en Compostela para o 29 de setembro
A Plataforma na Defensa do Servizo Público de Prevención e Defensa Contra Incendios Forestais de Galicia convoca unha manifestación para o vindeiro sábado 29 de setembro en Compostela, para oporse á privatización do Servizo por parte da Xunta de Galicia e reclamar unha Mesa de Negociación para buscar solucións ao Servizo. A manifestación partirá da Estación de Trens de Compostela ás 11:30 da mañá.
