O objectivo destes mais de trinta jovens é a reivindicaçom dos seus legítimos direitos como estudantes do plano em extinçom, nom aceitando as consequências negativas que está a acarretar a adaptaçom ao EESS. Este protesto insire-se numha campanha que leva meses em desenvolvimento, e através da qual os e as estudantes mobilizadas exigem seis convocatórias e tutorias reais para as matérias em extinçom, a garantia dumha optatividade real que permita rematar os itinerários ou a supressom do mestrado docente, entre outros pontos. A ameaça ao ensino público, consequência directa da homogenizaçom com Europa nos planos de estudo, está também detrás dos protestos.

O trato com o pessoal da biblioteca foi bom em todo momento, e a meia tarde da jornada de onte a Reitoria dava os primeiros passos para a negociaçom. O vice-decano de assuntos económicos, Francisco Durán Villa, baixou para ouvir em pessoa as reivindicaçons das pessoas mobilizadas, para translada-las ao resto da equipa reitoral. Na altura, os membros da Assembleia nom recebérom ainda resposta.

Segundo informam as pessoas mobilizadas o encerramento convocado pola Assembleia Geral, e secundado em exclussividade pola organizaçom estudantil Agir, será indefinido, e só rematará quando exista um compromisso por escrito da Reitoria que aceite as condiçons assinaladas.

Para além disto, o encerro pretende reivindicar um horário de bibliotecas amplo na época prévia aos exames quadrimestrais, depois de que a faculdade de medicina abandonasse o seu horário extraordinário empiorando um serviço já mui limitado.