Encomendas, mediante depósito de 18 euros (12 do livro + 6 de gastos de envio) na conta:

NovaGalicia Banco 2091-0223-95-3040012652

em nome da Associaçom Cultural Diário Liberdade.

Manda-nos o comprovativo do depósito bancário ao nosso correio: diarioliberdade@gmail.com

e enviamos-che o livro a qualquer ponto da Galiza ou do Estado espanhol

O personagem do Apalpador, um ser lendário da tradiçom popular galega que no inverno se preocupava por que as crianças pudessem alimentar-se, será o protagonista do primeiro volume tirado do prelo polo nosso jornal.

Com umha tiragem de 200 exemplares, este conto infantil foi possível graças ao apoio do jornal Novas da Galiza, das associaçons culturais A Gentalha do Pichel e a Fundaçom Artábria, da Associaçom Galega da Língua e do Bar o 13 que colaborárom economicamente na ediçom da obra.

Com textos de Diego Bernal e dezasseis desenhos do pintor viguês Manuel Bernal, a estória recria a lenda deste carvoeiro denominado nalguns pontos da Galiza Pandegueiro ou Apalpa-barrigas e que foi resgatado do esquecimento há uns anos graças ao trabalho do associacionismo cultural galego, nomeadamente da associaçom compostelana a Gentalha do Pichel.

Diego Bernal explicou que "o livro visa ser um pequeno contributo para a recuperaçom desta formosa lenda de que apenas se tinha constáncia em comarcas de montanha do leste galego, como o Courel ou o Berzo, mas que com certeza tivo que abranger um espaço maior ao que tem hoje". "Graças ao magnífico trabalho de associaçons culturais de base hoje o Apalpador deixou de ser umha estória moribunda privativa de umhas certas regions para se tornar um viçoso património da cultura galega", diz Diego.

O Apalpador: tradiçom e modernidade

O Apalpador é um bom exemplo de como a tradiçom cultural pode ser recuperada e mesmo atualizada sem sofrer umha distorçom deformadora. "Umha das cousas que me parece mais interessante da figura do Apalpador é como foi resgatada e adaptada ao século XXI", sublinha o autor, "sem perder a sua essência, o Apalpador nom é só umha tradiçom cultural galega senom o fomento de uns valores frente ao consumismo natalício" lembra Bernal. Assim os presentes que dá o Apalpador, a diferença do Papai Noel ou Pai Natal, nom som comprados senom feitos a mao. "Afinal a criatividade e a solidariedade que definem o Apalpador nascem das entranhas de um povo, o pai natal é um invento de umha multinacional norte-americana, a Coca-Cola" afirma Diego Bernal.

Este novo material do Diário Liberdade poderá ser comprado proximamente polos nossos leitores e leitoras através do nosso site.

Foto: Ilustraçom de Manuel Bernal para o livro do Apalpador.