Foto: Praza

Assim o decidiu o quarto juiz ao que lhe foi asignado o caso, contrariando o informe policial que serviu de base à detençom de Ismael López Pérez, Sergio Santiago Martínez, Francisco Javier Jiménez Linares e José Luis Zarzoso. O juiz tomou a decisom após ouvir as declaraçons de duas testemunhas (um agente de mobilidade e um taxista), que afirmárom que a pessoa que mostram os vídeos sendo atirado ao rio Manzanares nom é o 'Jimmy', mas outro siareiro do Desportivo da Corunha que foi resgatado com vida. Deste jeito, o juiz eximiu os acusados do assassinato de 'Jimmy' e decretou a sua liberdade, embora nom ter sido solicitada nem pola acusaçom do estado nem polos advogados da defesa.

Agora, os quatro ultras só deverám enfrentar umha sançom por participaçom em 'rinha tumultuária'. Esta mesma acusaçom pesa sobre todas as pessoas detidas na Operación Neptuno, tanto adeptos do Desportivo quanto do Atlético de Madrid, embora as últimas provas policiais determinassem que nom foi um confronto pactuado, mas umha emboscada dos ultras do Frente Atlético contra os visitantes galegos.

A posta em liberdade dos principais acusados foi recebida com estupefaçom por parte dos corpos policiais que realizárom a investigaçom do caso. Segundo recolhe a imprensa burguesa, os investigadores asseguram que a pessoa que aparece nas filmagens caindo ao rio é, sem dúvida, o 'Jimmy', conclusom à que chegárom após horas de visionado de imagens e interrogatórios de testemunhas. Nom entendem, aliás, que a decisom fosse tomada antes de ouvir as testemunhas que ainda faltam por declarar.

Por sua parte, os Riazor Blues, torcida à que pertencia o falecido 'Jimmy', manifestárom o seu "mais absoluto desprezo" pola decisom do juiz, que demonstra "a absoluta impunidade com a que atuam os fascistas e neonazis", e anunciam que continuarám a luitar "para que exista justiça para o Jimmy e para que a sua memória e a das outras vítimas do fascismo no seja esquecida".