Meses de espera injustificada, complicaçons hepáticas e outros problemas derivados da negativa do governo do PP a atender em condiçons as galegas e galegos com hepatite C. Um mínimo de seis mortes provocadas pola atitude da Administraçom pública em maos da direita neoliberal que agora leva dous altos cargos da Junta à barra do tribunal.

Fôrom dúzias as galegas e galegos que durante os últimos anos tenhem padecido desatendimento farmacológico, provocando a morte de nom menos de seis pessoas, o que já levou à abertura da primeira causa judicial contra a administraçom pública no Estado espanhol por um crime de "homicídios imprudentes".

A longa luita do coletivo continua, com a denúncia da gestom neoliberal do PP em matéria de saúde. Junto a privatizaçons, reduçom de orçamentos, supressom de camas, etc, destaca o gravíssimo abandono à sua sorte de dúzias de doentes hepáticos galegos.

Dous altos cargos da Junta da Galiza deverám apresentar depoimento nos tribunais de Compostela polos homicídios, se bem a atuaçom nom respondeu à iniciativa individual e sim a umha política planeada a partir da Direçom Geral e da Conselharia da Saúde da Junta da Galiza.

A Uniom de Consumidores da Galiza vai exercer acusaçom particular pola negativa à entrega de medicamentos a pessoas cuja vida dependia desses fármacos. Os critérios para a subministraçom de medicamentos respendeu a critérios de prioridade nos cortes em despesas sobre a saúde das pessoas.