Várias mobilizaçons e atos confluírom nesta manhá na capital da Galiza polo 95º Dia da Pátria Galega que neste 25 de julho encheu Compostela de bandeiras azuis, brancas e vermelhas, para desgosto de um estado nacionalista espanhol que trouxo Filipe VI, Rei do país vizinho, como principal aposta para afundar na alienaçom do nosso País.
Assim, após atingir umha boa adesom na tarde de dia 24, as mobilizaçons do dia a seguir juntárom vários milhares de pessoas por volta de diferentes legendas, da genérica "soberania" à "independência" mas, em qualquer caso, em umha defesa clara dos direitos sociais e nacionais galegos.
Para além dos atos políticos em chave mornamente galeguista convocados por Anova e CxG, havia três manifestaçons, que partírom de umha Alameda cheia de bancas de coletivos sociais -entre os quais o próprio Diário Liberdade- entre as 12:00 e as 13:30. Às reivindicaçons nacionais galegas, em todas as manifestaçons somou-se a solidariedade com o Povo Palestiniano, a sofrer duríssimas agressons militares sionistas nestes dias.
Disponibilizamos umha galeria fotográfica das manifestaçons deste 25J:
Manifestaçons de BNG, Nós-UP e Causa Galiza
A primeira passeata a sair, e a que atingiu maior número de participantes foi a do BNG. Vários milhares de pessoas percorrêrom as ruas do centro compostelano até à Praça da Quintá, sob a palavra de ordem "Em pé pola Galiza. Pola soberania, a democracia e os direitos sociais". Numha praça completamente cheia, o vozeiro nacional do Bloco, Xavier Vence, chamou a alargar o seu projeto nacionalista.
Ao filo das 13:00 dava início a manifestaçom convocada por Nós-UP, reclamando a "República Galega", que atingiu as 250 pessoas participantes. No ato final Rebeca Bravo, vozeira nacional do partido, lembrou as agressons que o capital infringe ao Povo Galego através de meios como o próprio Estado espanhol, e advertiu que opçons como IU ou Podemos apenas querem manter um capitalismo "com maquilhagem".
O último protesto da manhá foi o de Causa Galiza, reclamando a "Independência", ao qual se somou um grupo de cerca de 30 antifascistas, alguns dos quais portavam bandeiras da república espanhola, reclamando "anistia total" para os e as presas antifascistas. Ao total, quase 200 pessoas que dêrom final aos atos na Praça do Pam, no meio de um exagerado aparelho da polícia espanhola e destacando a solidariedade com as presas e presos independentistas.
Para além da presença de agentes de distúrbios espanhóis em grande parte do percurso, que identificárom a várias pessoas no dia 24 de julho, foi constante a presença de um helicóptero do corpo repressivo do país vizinho a acompanhar do ar, em quase todo o momento, as manifestaçons das entidades revolucionárias galegas.
Galeria fotográfica de 24J
Para além da galeria deste Dia da Pátria, disponibilizamos também a galeria das mobilizaçons na véspera, dia 24/07.
Vídeos
Ainda, podes visualizar os vídeos que forom resultado da emisom ao vivo feita polos repórteres do Diário Liberdade. É nesta caixa:
Live streaming video by Ustream
Diário Liberdade acompanhou ao vivo
Mais um ano, tal como fijo desde o início da sua atividade em 2010, o Diário Liberdade acompanhou os atos deste Dia da Pátria ao vivo. Continuamos, como sempre, a pedir o vosso apoio, imprescindível para a sobrevivência de um meio de comunicaçom ativista e sem fins lucrativos que, como este, está ao serviço da maioria social, mas em contra da minoria poderosa que nos submete.
[Atualizado às 21:45, 24/07/14] Galiza, 24 de julho: Boa participaçom na cadeia humana solidária e na mani independentista juvenil
Continuando com os atos convocados na véspera do Dia da Pátria Galega, passadas as 20:00h saía da Alameda a manifestaçom independentista convocada polas organizaçons juvenis e estudantis que fam parte da Coordenadora Juvenil Galega.
A mobilizaçom da juventude continuou com o bom nível de participaçom iniciado pola Cadeia Humana. Centenares de jovens reunírom-se numha manifestaçom que continua com a unidade de açom iniciada no 24 de Julho de 2013 sob umha mensagem abertamente independentista.
Para além dos gritos reclamando a independência da Galiza e doutras palavras de ordem patrióticas como “Espanha é a nossa ruína”, na marcha juvenil, que tivo umha participaçom similar à do ano passado, em torno das 700 pessoas, também houvo espaço para a reivindicaçom anticapitalista e feminista, ou para a solidariedade com o povo palestino na sua luita contra o imperialismo sionista.
Após atravessar a Praça da Galiza, a manifestaçom dirigiu-se face a zona histórica de Compostela. Novamente cumpre destacar a forte, e criminalizadora, presença policial. A polícia de choque espanhola estivo presente durante todo o percurso da marcha, tentando intimidar @s independentistas.
A Praça do Toural recebeu as e os jovens, que lá se concentrárom para dar passagem ao ato final da mobilizaçom, com a leitura do manifesto unitário. A manifestaçom acabou com a queima de umha bandeira espanhola e com a interpretaçom do Hino Nacional e gritos de “Independência!” e aplausos generalizados.
Lembramos aos nossos leitores que neste 25 de julho continuamos com a informaçom a pé de rua a partir do meio-dia, acompanhando as diferentes mobilizaçons convocadas.
Galeria de fotos
A seguir publicamos a galeria fotográfica elaborada polo Diário Liberdade na cadeia polos presos e presas independentistas e na manifestaçom juvenil pola independência:
[Atualizado às 20:00] Decorreu a VII Cadeia Humana pola liberdade d@s pres@s independentistas, convocada por Ceivar sob a legenda “Solidariedade imparável, liberdade presas/os independentistas” e que percorreu as ruas de Compostela após partir da Praça da Galiza passadas às 18:00h.
Mais de 300 pessoas chegadas de toda a Galiza (mais do que no ano passado) expressárom a sua solidariedade com @s pres@s polític@s independentistas Maria Osório, Eduardo Vigo, Carlos Calvo, Antom Santos e Roberto R. Fialhega, encarcerad@s e dispersad@s a prisons espanholas, a centenares de quilómetros das suas moradas, das suas famílias, amizades e companheir@s.
Na mobilizaçom houvo presença da polícia espanhola, que nos últimos dias voltou a ocupar a capital da Galiza perante a proximidade das jornadas de reivindicaçom patriótica do 24 e do 25 de Julho. A habitual atitude intimidatória e antidemocrática do corpo repressivo espanhol deixou-se ver desde antes do começo da Cadeia Humana, produzindo-se as primeiras identificaçons arbitrárias a pessoas que íam participar na marcha, segundo informava Ceivar.
A amnistia para @s prisioneir@s polític@s e a independência para a Galiza fôrom as palavras de ordem que protagonizárom a marcha anti-repressiva ao seu passo polas ruas da zona velha compostelana, umha marcha que contou com o apoio e participaçom da associaçom de familiares e amig@s de pres@s Que Voltem para a Casa! e também de militantes de diversas organizaçons do movimento independentista. Houvo, aliás, representaçom internacionalista vinda dos Países Cataláns ou Castela.
O ato final da mobilizaçom decorreu na Praça do Toural por volta das 19:30. Nas intervençons perante as pessoas lá congregadas participárom, entre outras, representantes de Ceivar e da plataforma Que Voltem para a Casa!, denunciando a dispersom e a repressom. Finalizou com o canto do hino nacional.
[Atualizado às 18:00] Vai dar começo a Cadeia Humana pola Liberdade d@s pres@s independentistas convocada por Ceivar. O organismo anti-repressivo denuncia as primeiras identificaçons policiais.
Com vídeo, fotografias e comentários ao vivo, o Diário Liberdade cobrirá as mobilizaçons do Dia Nacional Galego, a começar amanhá (24) com a Cadeia Anti-repressiva (18:00 h.).
Mais um ano, e como todos desde o nascimento deste meio em 2010, o Diário Liberdade estará em Compostela nos dias 24 e 25 de julho, para informar ao vivo do desenvolvimento das manifestaçons e doutras iniciativas lúdicas e reivindicativas em torno da reivindicaçom nacional galega.
Informaçons ao vivo: vídeo e twitter
Os e as repórteres do Diário Liberdade estarám nas ruas de Compostela informando ao vivo desde a tarde de dia 24 e até o final das convocatórias previstas para dia 25. Na caixa de vídeo embaixo emitiremos diretamente e em tempo real imagens e som das ruas da capital galega e das mobilizaçons que decorrerám. A emissom começará com a Cadeia anti-repressiva convocada por Ceivar para as 18:00.
Live streaming video by Ustream
Também podes acompanhar o nosso twitter @diarioliberdade, onde, minuto a minuto, vamos disponibilizar imagens, comentários e análises das mobilizaçons protagonizadas polas organizaçons da esquerda nacional galega, que também poderás seguir no corpo desta notícia.
Publicaremos fotografias, vídeos e reportaremos minuto a minuto todo o que acontecer nas ruas da capital galega nestas jornadas de luita do povo galego contra a assimilaçom espanhola e a miséria capitalista. Desde já, apelamos as pessoas que puderem enviar informaçons, fotos, vídeos ou qualquer outra colaboraçom a fazê-lo no email diarioliberdade@gmail.com . Só dessa maneira poderemos visibilizar o que, com certeza, os meios burgueses tentarám silenciar.
Presença na Alameda na manhá de dia 25
Na manhá desse dia, colaboradores e colaboradoras do Diário Liberdade estarám na Alameda de Compostela a repartir material promocional e esperando o vosso apoio económico, a única maneira através da qual podemos enfrentar as importantes despesas que a nossa atividade implica.
Todas as convocatórias da esquerda nacional no Dia da Pátria Galega 2014
Avançando em ordem cronológica, AMI anunciou umha performance às 10 da manhá e um jantar popular às 14 horas, ambos no CSO Escárnio e Maldizer de Compostela.
Polas 16 horas do 24 de julho, "na zona velha" da capital galega, começam os eventos convocados para a parte da tarde. Trata-se de um anónimo "Lipdub pola Independência" que vai ser filmado a partir dessa hora e cuja cançom base e convocatória estám na rede.
Às 17 horas, Fórum pola Ruptura Democrática na Faculdade de Filosofia da USC, organizado pola Anova, com participaçom de X. M. Beiras, do basco Ander Rodríguez (EH-Bildu), os cataláns Eudald Calvo (CUP) e Gerardo Pisarello (Guanyem) e o espanhol Alberto Garzón (IU).
Duas horas mais tarde, às 18 horas, começa na praça da Galiza a sétima ediçom da Cadeia Humana pola Liberdade das Presas e Presos Independentistas, convocada pola organizaçom solidária antirrepressiva CEIVAR. Além de rodear por completo essa central praça da capital, costuma converter-se em marcha pola zona velha da cidade.
Já às 20 horas, com saída na Alameda, parte a única convocatória unitária deste ano. É a manifestaçom independentista juvenil, que polo segundo ano consecutivo consegue ajuntar o fragmentado campo das entidades de jovens independentas e soberanistas. Elas som: AGIR, AMI, BRIGA, Comités, Galiza Nova, Isca!, LEG e Xeira. Oito organizaçons que convocam sob a legenda "A mocidade mantendo viva a Galiza: Independência".
A seguir à mobilizaçom, BRIGA propom um concerto no Cámpus Sul, em frente à Faculdade de Engenharia Química, na que vai ser a sua décima Jornada de Rebeliom Juvenil. Música galega e basca com Liska!, Raiva, Betagarri e Atzembla, a partir das 22 horas.
Ainda na noite do 24 de julho, o Festigal acolhe todo o tipo de eventos musicais, editoriais e culturais. É no Cámpus Sul da capital galega.
25 de julho: Três manifestaçons e um comício
No Dia da Pátria, três manifestaçons fôrom convocadas no ámbito do soberanismo e do independentismo de esquerda.
A primeira e mais multitudinária será a do BNG, que parte da Alameda às 12 do meio-dia. "Em pé por Galiza! Soberania, democracia e direitos" é o mote. A seguir organiza jantar no Cámpus Sul.
À mesma hora, no Panteom de Galegos Ilustres, Compromisso por Galiza organiza umha oferta floral com discurso de X. M. Báscuas.
A esquerda independentista manifesta-se também na Alameda, com saída às 12h30 na convocatória de NÓS-Unidade Popular: República galega, feminista e socialista" é a legenda proposta. O jantar será do parque de Belvis.
A terceira convocatória é de Causa Galiza, com a legenda "Independência para vivermos com dignidade no nosso país". A seguir, romaria popular no parque de Lasalle.
À mesma hora, Anova inicia o seu comício na praça 8 de março. Falará Xosé Manuel Beiras. Posteriormente, jantar no parque de Belvis.
Diferentes convocatórias de caráter comarcal e local espalham-se nestes dias um pouco por todo o País. Delas estamos a tentar informar no Diário Liberdade, agradecendo a comunicaçom das mesmas para irmos completando a programaçom desta nova ediçom do Dia da Pátria.